- MISIONI I INSPEKTORIATIT SHTETËROR SHËNDETËSOR
Inspektorati Shtetëror Shëndetësor ka për mision garantimin e respektimit të kërkesave ligjore në fushën e shëndetit publik.
Inspektorati Shtetëror Shëndetësor është përgjegjës për të gjitha funksionet e inspektimit të ministrisë përgjegjëse për shëndetësinë, me përjashtim të inspektimit të veprimtarive në fushën farmaceutike.
ISHSH ushtron veprimtarinë e tij në bazë dhe zbatim të Ligjit Nr. 10 433, datë 16.6.2011 “Për inspektimin në Republikën e Shqipërisë”, Vendimit të Këshillit të Ministrave Nr. 241, datë 27.3.2013 “Për Organizimin dhe Funksionimin e Inspektoratin Shtetëror Shëndetësor”, si dhe Urdhrit Nr. 163, datë 19.05.2014 të Kryeministrit të Shqipërisë “Për miratimin e strukturës dhe të organikës së Inspektoratit Shtetëror Shëndetësor”. ISHSH është institucion qendror buxhetor, organizuar në nivel qendror e rajonal, me seli qendrore në Tiranë, në varësi të ministrit përgjegjës për shëndetësinë.
ISHSH drejtohet nga kryeinspektori. Kryeinspektori është titullari i institucionit, i cili, në kuadër të funksioneve dhe detyrave të Inspektoratit Shtetëror Shëndetësor ushtron kompetencat e tij.
ISHSH organizohet në dy nivele: në nivel qendror dhe atë rajonal për çdo qark të vendit.
- INSPEKTORATI SHTETËROR SHËNDETËSOR
ISHSH qendror drejtohet nga kryeinspektori. Kryeinspektori është titullari i institucionit, i cili në kuadër të funksioneve dhe detyrave të Inspektoratit Shtetëror Shëndetësor, është përgjegjës për organizimin dhe koordinimin e funksionimit si dhe për cilësinë dhe efektivitetin e veprimtarisë së ISHSH.
ISHSH në nivel qëndror përbëhet nga:
- Kryeinspektori;
- Sektori i Koordinimit dhe Monitorimit të Inspektimit;
- Sektori Juridik dhe i Hartimit të Proçedurave të Inspektimit;
- Sektori i Financës dhe Shërbimeve Mbështetëse.
ISHSH rajonale drejtohen nga kryeinspektorët rajonalë. Kryeinspektori rajonal përfaqëson degën rajonale në marrëdhënie me të tretët në nivelin e qarkut përkatës dhe është përgjegjës për organizimin e funksionimin si dhe për cilësinë dhe efektivitetin e veprimtarisë së degës së tij.
ISHSH në nivel rajonal përbëhet nga:
· Titullari i degës Rajonale/Kryeinspektor;
· Sektori i Inspektimit Sanitar;
· Sektori i Inspektimeve të tjera Shëndetësore;
· Sektori Juridik;
· Sektori i Financës dhe Shërbimeve Mbështetëse.
